Հայաստանի Հանրապետության

կենտրոնական ընտրական հանձնաժողով

պաշտոնական կայք

Նորություններ

20 Հունվար, 2017
Այսօր կայացած արտահերթ նիստում ՀՀ կենտրոնական ընտրական հանձնաժողովը թիվ 1 տարածքային ընտրական հանձնաժողովի անդամ է նշանակել Վահագն Ավետիքի Նիկողոսյանին` համապատասխան լրացում կատարելով ԿԸՀ 2016 թ. դեկտեմբերի 16-ի թիվ 151-Ա որոշման մեջ:
ԿԸՀ որոշմամբ` լրացումներ են կատարվել նաև հանձնաժողովի 2016 թ. նոյեմբերի 22-ի «Ազգային ժողովի և տեղական ինքնակառավարման մարմինների ընտրությունների արձանագրությունների ձևերը, ընտրական տեղամասում քվեարկության արդյունքների արձանագրությունից քաղվածքի ձևը սահմանելու մասին» N 140-Ն որոշման մեջ:
11 Հունվար, 2017
«Ժառանգություն» կուսակցության անդամ Հովսեփ Խուրշուդյանի հայտարարության առ այն, որ ԿԸՀ-ն մերժել է վերապատրաստել «Ժառանգություն» կուսակցության ներկայացրած ընտրական հանձնաժողովի 120 անդամներին, դրանով խոչընդոտելով կուսակցությանը, որևէ աղերս չունի իրականության հետ:
Կենտրոնական ընտրական հանձնաժողովը տեղեկացնում է, որ 2016թ. հանրապետության ողջ տարածքում կազմակերպվել և անցկացվել են տեղամասային ընտրական հանձնաժողովի անդամության թեկնածուների մասնագիտական դասընթացներ: Դասընթացներին մասնակցելու համար ներկայացվել է ընդհանուր թվով 48515 քաղաքացիների վերաբերյալ հայտ: «Ժառանգություն» կուսակցության կողմից ներկայացվել է 2696 քաղաքացիների վերաբերյալ հայտ, որոնցից դասընթացներին մասնակցել են 1800 և 1721-ը ստացել են որակավորման վկայականներ:
Ինչ վերաբերում է լրացուցիչ ստուգարքի կազմակերպմանը, ապա Կենտրոնական ընտրական հանձնաժողովի նախաձեռնությամբ դեռևս 2016թ-ի նոյեմբերի 28–ին տեղի է ունեցել հանդիպում խորհրդարանական և արտախորհրդարանական կուսակցությունների ներկայացուցիչների հետ, որի ժամանակ քննարկվել է նաև լրացուցիչ ստուգարքներ անցկացնելու հարցը: Արդյունքում Կենտրոնական ընտրական հանձնաժողովը հայտնել է պատրաստակամություն անցկացնելու լրացուցիչ ստուգարքներ խորհրդարանական և արտախորհրդարանական կուսակցությունների ներկայացրած հայտերի հիման վրա:
Խախտելով խորհրդարանական յուրաքանչյուր կուսակցության կողմից 500 քաղաքացու վերաբերյալ հայտ ներկայացնելու պայմանավորվածությունը՝ «Ժառանգություն» կուսակցությունը ներկայացրել է հայտ 670 քաղաքացիների վերաբերյալ, և անգամ այդ դեպքում որևէ խոչընդոտ չի հարուցվել, և առաջիկայում Կենտրոնական ընտրական հանձնաժողովը կազմակերպելու է ստուգարքներ ինչպես այդ 670 քաղաքացիների, այնպես էլ բոլոր մյուս կուսակցությունների ներկայացրած անձանց համար:
11 Հունվար, 2017
Այսօր կայացած արտահերթ նիստում ՀՀ կենտրոնական ընտրական հանձնաժողովը «Ընտրություններ» ավտոմատացված համակարգի միջոցով էլեկտրոնային վիճակահանությամբ իրականացրել է Արագածոտն, Արարատ, Արմավիր, Գեղարքունիք, Կոտայք, Շիրակ և Սյունիք մարզերի թվով 10 համայնքներում 2017 թվականի փետրվարի 12-ին կայանալիք տեղական ինքնակառավարման մարմինների ընտրությունների տեղամասային ընտրական հանձնաժողովների նախագահների և քարտուղարների պաշտոնների բաշխումը` Ազգային ժողովում խմբակցություն ունեցող կուսակցությունների, կուսակցությունների դաշինքի միջև:
Արտահերթ նիստում հանձնաժողովի որոշմամբ սահմանվել է ընտրողների գրանցման տեխնիկական սարքավորումները սպասարկող մասնագետների ընտրության, դիմումների ներկայացման, ուսուցման եվ մասնագիտական գիտելիքների ու աշխատանքային ունակությունների ստուգման կարգը:
ԿԸՀ-ն սահմանել է նաև ԱԺ ընտրությունների ժամանակ քվեարկությանը մասնակցած ընտրողների ցուցակները սկանավորելու կարգը, ինչպես նաև ընտրական իրավահարաբերությունները կանոնակարգող մի շարք այլ կարգեր և փաստաթղթերի օրինակելի ձևեր:
Նիստում հանձնաժողովն ուժը կորցրած է ճանաչել ԿԸՀ մի շարք նորմատիվ որոշումներ: