Կենտրոնական ընտրական հանձնաժողովը հուլիսի 24-ից օգոստոսի 6-ը հայտարարում է լրագրողների հավատարմագրում՝ հանձնաժողովի աշխատանքները լուսաբանելու համար։

Լրագրողին հավատարմագրելու նպատակով լրատվական գործունեություն իրականացնողը գրավոր դիմում է ներկայացնում Հանձնաժողով՝ նշելով.

1) լրատվական գործունեություն իրականացնող իրավաբանական անձի լրիվ անվանումը, կազմակերպական-իրավական ձևը, գտնվելու վայրի հասցեն, իսկ ֆիզիկական անձի դեպքում՝ ազգանունը, անունը, հայրանունը (եթե հայրանունը նշված է անձնագրում), հանրային ծառայության համարանիշը և մշտական բնակության վայրի հասցեն.

2) հավատարմագրման ներկայացվող լրագրողի (լրագրողների) ազգանունը, անունը, հայրանունը (եթե հայրանունը նշված է անձնագրում), զբաղեցրած հաստիքը (լրագրող, լուսանկարիչ, տեսաձայնագրման օպերատոր), հանրային ծառայության համարանիշը և բնակության վայրի հասցեն.

3) զանգվածային լրատվության միջոցի (միջոցների) անվանումը, որին (որոնց) պետք է ներկայացնի հավատարմագրված լրագրողը.

4) հավատարմագրման ներկայացվող լրագրողի անձը հաստատող փաստաթղթի (անձնագիր, նույնականացման քարտ) պատճենը  և երկու լուսանկար՝  3x4 չափի.

5) լրատվական գործունեություն իրականացնողի և լրագրողի էլեկտրոնային փոստի հասցեները, հեռախոսահամարները։

Օտարերկրյա պետության օրենսդրության հիման վրա գործող լրատվական գործունեություն իրականացնողի ներկայացուցիչը հավատարմագրման համար դիմումին կից պետք է ներկայացնի նաև Հայաստանի Հանրապետությունում լրագրողի հավատարմագրման` Հայաստանի Հանրապետության արտաքին գործերի նախարարության կողմից տրված վկայականի պատճենը:

Օտարերկրյա պետության օրենսդրության հիման վրա գործող լրատվական գործունեություն իրականացնողի ներկայացուցիչ լրագրողի համար Հայաստանի Հանրապետության հավատարմագրում չի պահանջվում, եթե Հայաստանի Հանրապետության տարածքում սահմանված կարգով գործում է տվյալ լրատվական գործունեություն իրականացնողի առանձնացված ստորաբաժանումը, որի անունից ներկայացվել է հավատարմագրման դիմումը:

Յուրաքանչյուր լրատվամիջոցից կարող է հավատարմագրվել ոչ ավելի, քան չորս ներկայացուցիչ՝ երկու լրագրող և երկու լուսանկարիչ կամ տեսաձայնագրման երկու օպերատոր:

Հարցերի դեպքում կարող եք գրել Sedagh@elections.am  կամ Press@elections.am  էլփոստերին։ Ընդգծենք, որ այս հավատարմագրումը միայն ԿԸՀ վարչական շենքի համար է, և Երևանի ավագանու ընտրություններին  ԿԸՀ տրամադրած բեյջերով  տեղամասերում լուսաբանում իրականացնել չեք կարող։